Диего Марадонанинг ўлими сабаблари бўйича янги эксперт хулосаси тайёрланди.

Марадонанинг шифокорлари ва тарбиячиларига қарши суд жараёни бошланишидан бир ой олдин янги эксперт хулосаси тақдим этилган эди, унга кўра аргентиналик тўсатдан юрак хуружидан вафот этганди.

Ўлим бир неча дақиқа ёки бир неча соат ичида содир бўлган деб тахмин қилинади. Бироқ аввалги эксперт хулосасида айтилишича, Марадонанинг изтироби тахминан ўн икки соат давом этган.

Прокуратура янги хулосани рад этди, чунки унинг муаллифи кардиология соҳасидаги мутахассис эмас ва ҳужжатни 72 соат ичида тайёрлаган.

“Бизнинг нуқтаи назаримиздан, бу ҳолат масалани ўзгартирмайди. Экспертнинг версияси фанлараро комиссиянинг 21 нафар мутахассисларининг уч ой давомида ишлаган ҳисоботига зиддир", — деди прокурор Патрисио Феррари.

Афсонавий аргентиналик футболчи 2020-йилнинг 25-ноябрида вафот этди. Ўша ойда Марадонанинг шифокори эҳтиётсизликда гумон қилиниб, тергов остида экани хабар қилинганди.

Изланишлар шуни кўрсатдики, Диего сурункали юрак етишмовчилигининг кучайиши натижасида келиб чиққан ўткир ўпка шиши натижасида вафот этган.

2021-йил март ойида Аргентинада “У ўлмади, ўлдирилди” шиори остида марш ташкил этилди, унинг иштирокчилари собиқ футболчининг ўлими ҳолатларини текширишни талаб қилишди.