Карло Анчелоттининг ўғли Хоселуни "Бавария"га қарши жавоб ўйинда захирадан майдонга туширишни таклиф қилди.

Мадриднинг “Реал” клуби Чемпионлар лигаси ярим финали жавоб учрашувида “Бавария”ни мағлуб этди (2:1).

81-дақиқада захирадан майдонга тушган Хоселу ўйиннинг 88 ва 91-дақиқаларида гол уриб, жамоасининг турнир финалига чиқишини таъминлади. У Чемпионлар лигаси плей-офф босқичида захирадан майдонга тушганидан кейин дубль қайд этган энг кекса футболчига айланди.

AS хабарига кўра, айнан Давиде Анчелотти отасига Хоселуни майдонга туширишни таклиф қилган ва бу якунда ўйинни ўзгартириб юборган ва "Реал"га асосий еврокубок финалига чиқиш имконини берган.

Movistar Plus+ кўрсатувида Давиде отасига: “Хоселуни чақиринг”, деган видеони намойиш этади.

Шундан сўнг Карло Хоселуни ёнига чақириб, унинг майдонга тушишини маълум қилди.