Сешанба куни Англия чемпионати доирасида "Тоттенхэм" ўз майдонида "Манчестер Сити"ни қабул қилди.
Анже Постекоглу шогирдлари 0:2 ҳисобида мағлуб бўлди ва Чемпионлар лигасига йўлланма олиш имкониятидан маҳрум бўлди.
“Тоттенхэм” мухлислари мағлубиятдан унчалик хафа бўлмагани ажабланарли, чунки бу натижа шимолий Лондоннинг бошқа бир клуби “Арсенал”нинг чемпион бўлишига тўсқинлик қилиши мумкин.
Айни пайтда ижтимоий тармоқларда “Тоттенхэм” захира ўриндиғи орқасидаги трибунадан суратга олинган видео пайдо бўлди.
Унда “шпорлар” бош мураббийи Анже Постекоглу мухлислардан бирига бармоғини кўрсатиб, унга қарата нимадир деб бақиргани, гўё уни қарғаётгани акс этган.
Постекоглуни бунга нима мажбур қилганини айтиш қийин.
