"Лестер" Грэм Поттерни бош мураббий қилиб тайинлаш борасида музокаралар олиб бормоқда.
The Telegraph нашрининг ёзишича, Поттер "Челси"га ўтиб кетган Энцо Мареска ўрнига асосий номзод ҳисобланади. Қайд этилишича, клуб ўтган йили Брендан Рожерсни ишдан бўшатганидан кейин Поттерни таклиф қилиш имкониятини кўриб чиққан.
Айни дамда Поттер ўйин ва жамоа таркиби мураббийга маъқул келганига қарамай, "Лестер"нинг таклифини қабул қилиш-қилмасликка шубҳа қилмоқда. Унинг тайинланишидаги муаммо бир қатор ўйинчиларни сотиш зарурати билан боғлиқ ноаниқлик ва молиявий қоидабузарликлар учун балларни олиб ташлаш бўлиши мумкин.
Поттернинг сўнгги клуби "Челси" бўлиб, у ерда 2022 йилнинг сентябридан 2023 йилнинг апрелигача ишлаган.
