Лондоннинг "Фулхэм" клуби ярим ҳимоячиси Жоау Палинья ўзининг "Бавария"га ўтиши борасида оптимистик фикрда. Журналист Флориан Плеттенбергнинг хабарига кўра, клублар ўртасидаги музокаралар қизғин кетмоқда ва португалиялик футболчининг ўзи келишувга эришилишига умид қилмоқда.
"Фулхэм" 28 ёшли Палинья учун тахминан 70 миллион евро талаб қилмоқда, аммо "Бавария" ҳали бундай пулни тўламоқчи эмас. Музокаралар давом этмоқда ва муросага эришилади деган умид бор.
Маълум қилинишича, "Бавария"нинг янги бош мураббийи Венсан Компани аллақачон Жоау билан гаплашиб бўлган. Ярим ҳимоячи Мюнхен гранди сафига ўтишни орзу қилади.
