Кетма-кет уч ўйинда гол ўтказмасдан йирик ҳисобда ғалаба қозонган “Машъал” бу сафар жиддий рақиб билан куч синашади.
Гап шундаки, муборакликлар бу йилги мавсумни 24 март куни Ўзбекистон Кубоги доирасида Бухоронинг “Спартак” жамоасига қарши ўйин билан бошлашди. Бу учрашув Ўзбекистон Кубогининг илк босқичидан ўрин олган беллашув эди. Ва бунда “газчилар” рақибдан 3:0 ҳисобида устун келиб, Кубокнинг навбатдаги босқичига йўл олишди.
Ундан кейин биринчи лига ўйинларига старт берилди ва “Машъал” илк турда яна “Спартак”ни қабул қилиб, бу сафар ҳам 3:0 ҳисобида ғалаба қозонди. 2-турда эса “Бухоро-2” билан куч синашган “газчилар” 4:0 ҳисобидаги ғалабани тантана қилишди. Эътибор берган бўлсангиз, “Машъал”нинг ҳар уччала ўйини ҳам Бухоро шаҳри вакилларига қарши кечди ва энг қизиғи, тўртинчи беллашувни ҳам “газчилар” Бухоро шаҳри жамоасига қарши ўтказишади. Фақат бу сафарги рақиб анча жиддий клуб ҳисобланади. Чунки 6 апрель куни Муборакка Тачмурод Агамуродов бошқараётган “Бухоро” ташриф буюради.
Табиийки “Бухоро” олий лига вакили бўлгани учун ўйиннинг қизиқарли кечишига шубҳа йўқ. Қолаверса, ютқазган жамоа Кубок билан хайрлашишини инобатга олсак, муборакликлар ҳам бор куч билан ҳаракат қилишлари турган гап. Шундай экан, барча мухлисларни 6 апрель кунги “Машъал” – “Бухоро” учрашувига кутиб қоламиз. Ўйиннинг бошланиш вақти 17:00.
«Машъал» (Муборак) «Бухоро» (Бухоро)
Ҳакамлар: З. Қодиров (Навоий), О. Жумаев (Навоий), Р. Самандаров (Навоий), Н. Қосимов (Қарши).
Назоратчи: А. Попов (Тошкент).
