Сешанба оқшомида Миржалол Қосимов “Бунёдкор” жамоаси бош мураббийи сифатида ўзининг 150-учрашувини ўтказди.
“Бунёдкор” футбол клуби олий лигада 2007 йилдан буён иштирок этиб келаётганидан яхши хабардорсиз. Ортда қолган вақт мобайнида клубимизда Миржалол Қосимовдан ташқари Ҳикмат Эргашев, Амет Мемет, Зико, Луиз Фелипе Сколари сингари мураббийлар фаолият юритишди. Статистикадан яққол ажралиб турибдики, ушбу мутахассислар ичида жамоага Миржалол Қосимов ҳаммадан кўра кўпроқ бош-қош бўлган.
2 апрель, сешанба куни бўлиб ўтган “Бунёдкор” – “Бейцзин Гоан” учрашувида Миржалол Қосимов “қалдирғочлар” бош мураббий сифатида ўзининг юбилей – 150-учрашувини ўтказди.
Миржалол Қўшоқович устозлик қилган 150та ўйиннинг 107тасида “Бунёдкор” ғалаба қозонган. 29 учрашувда дуранг қайд этилган бўлса, 14та баҳсда имконият бой берилган. Тўплар фарқи – 304-88. Жамғарилган очколар сони эса 349та. Бажарилган иш коэффициенти 78 фоизни ташкил этади.
Дарвоқе, “Бунёдкор” мураббийлари ичида Миржалол Қосимов энг ёши кичиги эканлигини ҳам таъкидлаб ўтиш жоиз.
