Самарқанднинг “Динамо” жамоаси майдони футбол учрашувларини қабул қилишга тайёр эмаслиги боис, янги мавсумда Суперлига баҳсларини Жиззахдаги стадионда ўтказди.

ПФЛ матбуот хизмати берган хабарга кўра, майдон ҳозирда шай ҳолатга келтирилган ва тест тариқасида Суперлига доирасидан ўрин олган “Динамо” — “Андижон” учрашувини қабул қилади. Майдоннинг қанчалик тайёр эканлиги ва унинг келгуси парвариши борасидаги режалар “Андижон” билан ўйиндан кейин яна бир карра аниқлаштириб олинади.

“Дарё”га келган мурожаатга кўра “Динамо” клуби Самарқандга қайтиши муносабати билан талабалар, бюджет ташкилотларига 100 тадан чипта сотиб олиши учун 2 миллион сўмдан йиғиш бўйича вилоят ҳокими ўринбосари Рустам Қобилов Zoom платформаси орқали йиғилиш давомида кўрсатма берган.

Ҳолат юзасидан Самарқанд вилояти ҳокимлиги ахборот хизмати раҳбари Манучеҳр Мирзаевнинг “Дарё” мухбирига маълум қилишича ҳокимлик томонидан бундай топшириқ берилмаган.

“Бундай топшириқ бўлмаган, чипталар кассада сотилмоқда”, — дейди вилоят ҳокимлиги матбуот хизмати раҳбари.

Маълумот учун, “Динамо” ҳамда “Андижон” клублари ўртасидаги учрашув 22 июнь куни 20:00 да бошланади. “Динамо” футбол клуби матбуот хизматининг хабарига кўра, ўйин учун чипталар 20 минг сўмдан сотилмоқда. CIP тоифасидаги марказий сектор учун чипта нархи эса 30 минг сўмни ташкил қилади.