Samarqandning “Dinamo” jamoasi maydoni futbol uchrashuvlarini qabul qilishga tayyor emasligi bois, yangi mavsumda Superliga bahslarini Jizzaxdagi stadionda o‘tkazdi.

PFL matbuot xizmati bergan xabarga ko‘ra, maydon hozirda shay holatga keltirilgan va test tariqasida Superliga doirasidan o‘rin olgan “Dinamo” — “Andijon” uchrashuvini qabul qiladi. Maydonning qanchalik tayyor ekanligi va uning kelgusi parvarishi borasidagi rejalar “Andijon” bilan o‘yindan keyin yana bir karra aniqlashtirib olinadi.

“Daryo”ga kelgan murojaatga ko‘ra “Dinamo” klubi Samarqandga qaytishi munosabati bilan talabalar, byudjet tashkilotlariga 100 tadan chipta sotib olishi uchun 2 million so‘mdan yig‘ish bo‘yicha viloyat hokimi o‘rinbosari Rustam Qobilov Zoom platformasi orqali yig‘ilish davomida ko‘rsatma bergan.

Holat yuzasidan Samarqand viloyati hokimligi axborot xizmati rahbari Manuchehr Mirzayevning “Daryo” muxbiriga ma’lum qilishicha hokimlik tomonidan bunday topshiriq berilmagan.

“Bunday topshiriq bo‘lmagan, chiptalar kassada sotilmoqda”, — deydi viloyat hokimligi matbuot xizmati rahbari.

Ma’lumot uchun, “Dinamo” hamda “Andijon” klublari o‘rtasidagi uchrashuv 22 iyun kuni 20:00 da boshlanadi. “Dinamo” futbol klubi matbuot xizmatining xabariga ko‘ra, o‘yin uchun chiptalar 20 ming so‘mdan sotilmoqda. CIP toifasidagi markaziy sektor uchun chipta narxi esa 30 ming so‘mni tashkil qiladi.