Мадриднинг “Реал” клуби ёзда Лени Йорони сотиб олмоқчи.
AS нашри хабарига кўра, Мадрид клуби ҳимоячини келаси йили - унинг "Лилль" билан шартномаси тугаганидан кейин сотиб олмоқчи бўлган. Бироқ Начо Фернандеснинг “Ал-Қодисия”га кетиши ва Рафа Мариннинг “Наполи”га ўтиши кутилаётгани “Реал”ни тезроқ ҳаракат қилишга мажбур қилмоқда.
Франция клуби Йоронинг трансфери учун 70 миллион евро олишни истамоқда. Футболчи учун "ПСЖ" ҳам давогарлик қилмоқда - парижликлар 60 миллион евро таклиф қилишди, Луиш Кампуш ҳар қандай ҳолатда ҳам Лени билан шартнома имзоламоқчи. Бироқ футболчининг ўзи "Реал Мадрид"га ўтмоқчи.
Испания клуби 18 ёшли ҳимоячи учун 40 миллион евродан кўп бўлмаган пул тўлашга тайёр ва бу суммани 30-35 миллионга тушириб, қолганини бонуслар кўринишида тўламоқчи.
"Реал" трансфер масаласини Олимпиада ўйинлари бошланишидан олдин ҳал қилмоқчи.
Ўтган мавсумда Лига 1да Йоро 32 та ўйин ўтказиб, 2 та гол урган.
