Эртага Осиё чемпионлар лигаси доирасида Тошкентнинг «Бунёдкор» жамоаси Хитойнинг «Бейцин Гоан» жамоасига қарши майдонга тушади. Бугун ҳар икки жамоа вакиллари иштирокида матбуот анжумани бўлиб ўтди.

Матбуот анжуманида биринчи бўлиб «қалдирғочлар» вакиллари иштирок этишди.

«Эртага бизни қизиқарли учрашув кутиб турибди. Бир ҳафта олдин «Бейцзин Гоан»ни Тошкентда юта олмагандик. Пекинликларни анчайин шаклланган ва тартибли жамоа деб биламан.

Чиройли ўйин кўрсатган ҳолда ўзимизга керакли бўлган натижани қайд этишга ҳаракат қиламиз. Эртанги баҳснинг аҳамияти юқори ва ҳар иккала жамоа учун учрашув нуфузи жуда ҳам баланд.

Мана бугун асосий аренада машғулот ўтказамиз ва ана шундан сўнг майдон ҳолати ҳақида фикр айта оламан. «Бейцзин Гоан» клубига қарши очиқ футбол намойиш этиб бўлмайди. Биз рақибга нисбатан керакли бўлган тактикани танлаб, сафардан ғалаба билан қайтишга ҳаракат қиламиз. Тўғри, футболда ҳар сафар ҳам ўйлаган мақсадингга эриша олмайсан. Бироқ бор кучимиз билан ўйнаб, мухлисларимизни хушнуд этмоқчимиз», - дейди Миржалол Қосимов.