Таниқли футбол агенти Герман Ткаченко “Бавария” клуби Москванинг “ЦСКА” клуби ярим ҳимоячиси Аббосбек Файзуллаевга қизиқиш билдираётгани ҳақида фикр билдирди. Шу йилнинг февраль ойида ўзбекистонлик футболчи ҳақиқатан ҳам унга “Бавария” қизиқаётганини тасдиқлаган эди.

“Германиянинг “Бавария” клуби Файзуллаев борасида боғланди, аммо улар Аббосни ҳозир сотиб олмоқчи эмас. Улар ҳозирги ҳолатни текширди, футболчи уларнинг маълумотлар базасида мавжуд. Скаутлар унинг нархи, футболчи билан шартнома шартларига қизиқиш билдирди. Бу немис клуби футболчини сотиб олиш ниятида эканини билдирмайди, одамлар шунчаки шу маълумотдан фойдаланмоқда”, — деди Ткаченко YouTube'даги “Коммент.Шоу” каналидаги Hepe We Go дастурида.

Эслатиб ўтамиз, 20 ёшли Файзуллаев 2021 йилдан 2023 йилгача “Пахтакор”нинг катталар жамоасида тўп сурган. Бу даврда у барча турнирларда 41 та учрашувда қатнашиб, 10 та гол ва 3 та голли узатмани амалга оширган. 2023 йилнинг ёзида Аббосбек “ЦСКА”га ўтди. Бу даврда у барча мусобақаларда 32 та ўйин ўтказиб, 5 та гол урди ва 14 та голли узатмани амалга оширди.