Шу йилнинг 22 февралида “Футбол бўйича спорт мусобақаларини ўтказиш вақтида томошабинларнинг (мухлисларнинг) ўзини тутиш қоидалари” бўйича Ўзбекистон Республикаси Маданият ва спорт ишлари вазирининг буйруғи қабул қилинди.

Буйруқда футбол учрашувлари пайтида мухлисларнинг ўзларини қандай тутиши кераклиги кенг маънода тушунтириб ўтилган.

Мазкур буйруқнинг ижросини таъминлаш мақсадида “Машъал” футбол клубининг уй ўйингоҳида биринчи лига ўйинлари олдидан фан-клуб аъзолари билан йиғилиш ўтказилди. Йиғилишда Баҳром Вафоев номидаги стадион директори Хўжамурод Казаков буйруқни мухлисларга ўқиб эшиттирди. Қоидалар ёзилган буклетларни ўйингоҳга ташриф буюрувчи мухлисларга тарқатиш эса фан-клуб етакчиларидан бири Шуҳрат Сафаров зиммасига юклатилди.

“Машъал”нинг ўз майдонида бўлиб ўтган “Спартак” ва “Бухоро-2” билан кечган баҳслари арафасида Шуҳрат Сафаров стадионга келган ишқибозларга мухлисларнинг ўзини тутиш қоидалари ёзилган буклетларни тарқатди. Бундан ташқари, ўйингоҳнинг кириш дарвозасига ҳам мазкур қоидалар стенд шаклида илиб қўйилди. Бундан буён фан-клуб вакиллари билан бу борадаги ишларни олиб бориш Сафаров Шуҳрат зиммасида бўлади.