"Гулистон" - "Бухоро" (1:0) ўйинидан кейинги матбуот анжуманида иштирок этган Бахтиёр Ашурматов гулистонликлар ғалаба қозонган бўлсаларда ўйин сифатидан қониқмаганини таъкидлади.

Бахтиёр Ашурматов, «Гулистон» бош мураббийи:
«Учрашув қийин кечишини олдиндан билгандик. Мен ҳурмат қиладиган энг тажрибали мутахассислардан бири Тачмурод Агамуродов бухороликларга устозлик қилади. Шунга қарамасдан ўзига хос ўйин услубига эга жамоа устидан ғалаба қозониб мухлисларни хурсанд қилдик. Гарчи зафар қучган бўлсак-да, ўйин сифатидан қониқиш ҳосил қилмадим. Нега десангиз, олдин ўтказилган тўртта учрашувдан кўра бугунгисида йигитларга эътирозим бўлди. Оддий вазиятларда ҳам хатоликларга йўл қўйишди. Яратилган хавфли вазиятлардан унумли фойдалана олмадик. Агарда меҳмонлар ҳам аниқроқ ҳаракат қилишганда балки кучлар тенг келармиди?! Бир вазиятда дарвоза устуни жамоамизни муқаррар голдан сақлади. Учрашув давомида бизни қўллаб-қувватлаб турган ишқибозларга чиройли ва ҳужумкор футбол намойиш этишга уриниб кўрдик. Лекин майдоннинг аҳволи бунга халақит берди».