BeIN Sports Лига 1 ўйинчиларидан Visit Qatar нишонини тақиб юришни талаб қилди.
Аввалроқ Лига 1ни намойиш қилиш ҳуқуқини DAZN ва beIN Sports компаниялари сотиб олгани ҳақида хабар берилганди. DAZN ҳар бир турнинг саккизта ўйинини, beIN Sports биттадан ўйинни кўрсатади.
The Guardian нашри хабарига кўра, beIN Sports телерадиокомпанияси келаси мавсумда Лига 1нинг ҳар бир футболчисидан жонли ўйинлар вақтида футболкаларида Visit Qatar нишонини тақиб юришни талаб қилган.
Бу сўров Қатар компанияси номидан унинг раиси, айни пайтда Париж клуби президенти Носир ал-Хелайфи томонидан берилган.
Ўйинчиларнинг Visit Qatar нишонларини тақиш талаби клублар ўртасида жиддий баҳс-мунозараларга сабаб бўлди. Аноним қолишни истаган хўжайинлардан бири буни "лигани эгаллашга уриниш" деб таърифлади.
"Агар мен Саудия сармоясини жалб қилмоқчи бўлсам-чи? Улар лигани эгаллашга ҳаракат қилишмоқда. Тушунишимча, президентлар ўртасидаги телефон суҳбатидан сўнг кўплаб янги шартлар таклиф қилинди", — деди мулкдорлардан бири.
"ПСЖ" ва beIN Sports манбалари бу даъволарни "анъанавий телерадиокомпаниялар хизматларидан фойдаланиш ўрнига жонли LFP каналини ишга туширишни хоҳлайдиган клубларнинг ғазабланган кампанияси" деб таърифлади.
