Англия Премьер-лигасининг расмий сайтида "Манчестер Сити"га қарши санкциялар ҳақида маълумот пайдо бўлди. Клуб 2022/2023 ва 2023/2024 йилги мавсумларда биринчи ва иккинчи бўлимни бошлаш мажбуриятлари бўйича қоидаларни бузганини тан олди. "Шаҳарликлар" кийим алмаштириш хонасидан кечикишлар билан ўйинларга чиқиб келишган.

Натижада, Премьер-лига ва "Манчестер Сити" ўртасида шундай 14 та қоидабузарлик учун жарима кўринишидаги санкциялар кўзда тутилган келишув тузилди. Ҳаммаси бўлиб, "Шаҳарликлар" 2,09 миллион фунт стерлинг тўлайди. Рўйхатдаги энг катта жарима - 200 минг.

Қўшимча қиламизки, 2023 йил бошида Премьер-лига "Манчестер Сити"ни 115 та молиявий қоидабузарликда айблаган, бироқ иш ҳанузгача кўриб чиқилмоқда.