Туриннинг «Ювентус» клуби ҳужумчиси Федерико Кьеза ҳозирги жамоаси сафида қолиш истагини билдирди. Инсайдер Жованни Альбанезе берган маълумотларга кўра, италиялик вингер бош мураббий Тиаго Моттани «кекса синьора»га фойдали бўлиши мумкинлигига ишонтирмоқчи.

Эслатиб ўтамиз, Кьезанинг «Ювентус» билан шартномаси тугашига бир йил вақт қолган, бироқ италиялик раҳбарият таклиф қилган шартлар бўйича шартномани узайтиришдан бош тортган эди. Аввалроқ футболчига Англия Премьер-лигаси ва Туркия Суперлигаси клублари қизиқиш билдираётган эди.

Ўтган мавсумда 26 ёшли Кьеза Италия А Сериясида 9 та гол урди ва 2 та голли узатмани амалга оширди.