Мадриднинг “Реал” клуби ҳужумчиси Килиан Мбаппе Франция футбол федерацияси орқали Франция лигаси ва УEФА ҳуқуқий комиссиясига мурожаат қилиб, ўзи аввал ўйнаган “ПСЖ”дан эски шартномаси бўйича 55 миллион евро қарзини тўлашни талаб қилди.
Бу ҳақда Marca хабар бермоқда. Шунингдек, футболчининг адвокатлари тўловларни самарали амалга ошириш учун Франция клубининг асосий акциядори Qatar Sports Investmentни нишонга олишга ҳаракат қилаётгани маълум қилинган.
Манбага кўра, талаб қилинадиган суммага футболчининг феврал ойида олиши керак бўлган шартнома имзолаш бонусининг охирги учдан бир қисми, унинг шартномасида кўрсатилган охирги уч ойлик маоши киради.
Маълум қилинишича, футболчининг атрофидагилар ўз ҳуқуқларини ҳимоя қилиш мақсадида профессионал футбол низомининг 259-моддасига амал қилмоқда. Ушбу моддада айтилишича, клублар шартнома тузган ўйинчиларнинг маошларини умумий қонунчилик шартларига мувофиқ ҳар ойнинг охирги кунидан кечиктирмай тўлашлари шарт.
