Тожикистон клубларида тўп тепган ўзбекистонлик футболчи Сайриддин Ғаффоров 34 ёшида вафот этди. Бу ҳақда “Динамо” матбуот хизмати хабар берди.

У футболчилик фаолияти давомида жароҳат олиб, даволаб бўлмайдиган касалликка йўлиққан. Соғлиғини хавф остига қўйиб бўлса-да, футболчи Тожикистон ва Ўзбекистоннинг турли клубларида ўйнашда давом этади. Сайриддин Тожикистонда икки марта жарроҳлик амалиётини ўтказган. Учинчи амалиёт Тошкентда ўтказилган.

Касаллик авж олиб, аста-секин футболчининг елкаси ва оёқларида оғриқлар пайдо бўла бошлайди, қўллари эса заифлашади. Кейинчалик Ғаффоров бутунлай фалаж бўлиб, нутқий қобилиятини йўқотади.

Шифокорлар Сайриддинда латерал амиотрофик склероз (ALS) борлигини аниқлади.

Сайриддин Ғаффоров 1990 йил 29 августда Ўзбекистоннинг Сурхондарё вилояти Сариосиё туманида туғилган. Футболчилик фаолиятини “Шўрчи” жамоасида бошлаган, сўнгра бир қатор клублар – “Шўртан”, Самарқанднинг “Динамо”, “Андижон”, “Сурхон” клубларида ўйнаган. Бундан ташқари Ғаффоров Тожикистоннинг “Регар-ТадАЗ”, “Равшан”, “Ҳосилот”, “Хўжанд” каби жамоаларида тўп тепган. Футболчи уч фарзанднинг отаси эди.

Футболчи 25 август куни вафот этган.