Марокаш терма жамоаси ва “Фиорентина” клуби ярим ҳимоячиси Софьян Амрабат Италия чемпионатини Туркия Суперлигасига ўзгартириши кутилмоқда.

Бу ҳақда ижтимоий тармоқлар орқали нуфузли инсайдер Фабрицио Романо маълум қилди. Ярим ҳимоячининг янги клуби "Фенербахче" бўлади. Истанбул клуби “бинафшаранглилар” билан футболчининг трансфери борасида келишиб олди. Амрабат мавсум охиригача икки миллион евро эвазига 13 миллионга сотиб олиш имконияти билан ижарага берилади.

Ўтган мавсумда Амрабат "Манчестер Юнайтед"да ижара асосида ўйнади. Ярим ҳимоячи Англия чемпионатида 21 та ўйин ўтказиб, 6 та сариқ карточка олди.