Хабарингиз бор, Ўзбекистон миллий терма жамоаси футбол бўйича Жаҳон чемпионатининг 3-саралаш босқичида илк учрашувини КХДР термасига қарши ўтказади. Ўйин 5 сентябрь куни “Бунёдкор” стадионида бўлиб ўтади.

Мазкур учрашувдан аввал ҳар иккала терма жамоага оид статистикани эътиборингизга ҳавола қиламиз.

Вакилларимиз КХДР термаси билан жами 11 маротаба ўзаро тўқнаш келган.

Ушбу ўйинларнинг 6 таси ўртоқлик, 4 таси жаҳон чемпионати саралаши ва биттаси Осиё кубоги доирасида ўтказилган.

Мазкур баҳсларда вакилларимиз 7 маротаба ғалаба қозонган бўлса, 3 дуранг ва 1 маротаба мағлуб бўлган. Эътиборли жиҳати шундаки, илк марта 1998 йил ўтган Ўзбекистон – КХДР учрашувида 4:0 ҳисоби қайд этилган бўлса, сўнгги баҳс 2019 йилда ташкил этилган ва унда ҳам вакилларимиз 4:0 ҳисобида ғалаба қозонган.

Статистикадан кўриниб турибдики, барча жиҳатларда Ўзбекистон терма жамоаси устун ва бу футболчиларимиз учун ҳам биринчи ўйинда муҳим 3 очкони қўлга киритишлари учун мотивация бўла олади.

Ҳар бир ўйин олдидан мухлислар ўз терма жамоаларининг трансфер нархи билан қизиқишлари табиий.

Ўзбекистон ва КХДР термаларининг "трансфермаркт"даги баҳоси билан сизларни таништириб ўтамиз.

Унга кўра, Ўзбекистон миллий терма жамоаси футболчиларининг умумий трансфер баҳоси 35,25 миллион еврони ташкил қилса, КХДР термаси таркибининг умумий трансфер қиймати 6,55 миллион евро.

Таркибимиздаги энг қиммат футболчи Аббосбек Файзуллаев (ЦСКА). Унинг трансфер қиймати 6 миллион евро. Рақиб жамоасида эса Кук Жол-Чангнинг трансфер нархи 450 минг еврога баҳоланган.

КХДР термасининг умумий трансфер нархи бизнинг ёш истеъдодли футболчимиз Аббосбек Файзуллаевдан бироз қимматроқ экани ҳам бу ўйиндаги устунлик Сречко Катанец шогирдлари томонидалигини кўрсатиб турибди.

Ҳа, бугун ўзбек футболида олдинга силжиш бор ва мухлислар футболчиларимиздан улкан зафарлар кутишда давом этмоқда.

Умид қиламизки, терма жамоамиз жаҳон чемпионатининг 3-саралаш босқичи илк учрашувида ғалабага эришади ва бу муваффақият сўнгги турга қадар давом этади.