Аввалроқ Лига финални юқори савияда ташкил этиш масаласида Фарғона вилояти мутасаддилари билан учрашув ўтказганди. Унда келишиб олинган масалалар юзасидан эндиликда "Навбаҳор" ва "Андижон" клуби раҳбарияти, шунингдек, мухлислар етакчилари билан фикр алмашилди, дейилади ПФЛ хабарида.

Учрашув давомида "Истиқлол" стадиони секторлари икки жамоа учун қандай ажратилиши, бунда клуб расмийлари, мухлислар ҳаракати қандай бўлиши, уларнинг стадионга қайси кўчалар орқали келиши ва турникетлардан қандай фойдаланиши каби масалалар тушунтириб ўтилди. Наманганлик ва андижонлик мухлисларга қулайлик яратиш мақсадида iTicket чипталарни ҳар икки вилоят бош стадионлари кассаси орқали ҳам сотишни йўлга қўяди. Чипталар электрон сотилмайди ва жонли навбат орқали ҳар бир мухлис максимум 4 донадан чипта харид қилиши таъминланади.

Шунингдек, ҳар икки жамоанинг Фарғонага етиб келиши, жойлашиши, ўйинолди расмий тадбирларда иштирок этиши, Ўзбекистон кубоги совринининг Наманган ва Андижон шаҳарларига йўл олиши, футбол мухлисларининг у билан суратга тушиши каби масалалар келишиб олинди.

Чипталар савдоси қай тартибда бўлиши, фақатгина финал беллашуви учун ОАВ ҳамда расмийларга алоҳида бейджиклар берилиши каби масалалардаги аниқ ахборот кейинроқ Лига расмий сайтига жойлаштирилади.