«Брест» Чемпионлар лигасидаги иккита ғалаба учун 4,2 миллион евро олади - бу клуб буджетининг 8,75 фоизи.

Франция клуби УЕФА Чемпионлар лигасининг умумий турнирини «Штурм» (уйда, 2:1) ва «Ред Булл Зальцбург» (4:0, меҳмон) устидан қозонилган ғалабалар билан бошлади.

Бу босқичдаги ҳар бир ғалаба 2,1 миллион евро олиб келади. "RMC Sport" маълумотларига кўра, 2 ғалаба учун 4,2 миллион клубнинг йиллик операцион буджети 48 миллион евронинг 8,75 фоизини ташкил қилади.

Шунингдек, 4,2 миллион евро клуб футболчиларнинг олти ойлик умумий маоши (ойлик иш ҳақи фонди 700 минг еврога баҳоланган) эквиваленти эканлиги қайд этилган.

Ўтган мавсумда «Брест» Лига 1да 3-ўринни эгаллаган. Жорий мавсумда жамоа 6 ўйиндан кейин 6 очко билан турнир жадвалида 13-ўринда бормоқда.