Виктор Осимхен Ливия билан ўйин олдидан Нигерия терма жамоасидаги вазиятга муносабат билдирди.

Жамоалар 15-октябрь, сешанба куни Африка кубоги саралаш турнирида тўқнаш келишлари керак эди.

"Кеча Ливия аэропортида менинг “акаларим” ва мураббийларимга нисбатан адолатсиз муносабатдан ҳафсалам пир бўлди.

Бундай ҳаракатлар спорт руҳига зиддир. Мен жамоамни қўллаб-қувватлайман ва улар бу тўсиқларга қарамай кучли бўлиб қолишларини биламан.

Мен CAF ва бошқа футбол ташкилотларини аралашишга чақираман, чунки менинг жамоадошларим ва расмийлар ҳали ҳам Ливия аэропортида бўлиб турибди. Бу ноўрин ва ғайриинсонийдир.

Ливия футбол ассоциациясининг бу уриниши энди шунчаки кечиктириш ҳолати эмас, бу футболчиларнинг руҳиятини заифлаштириш ва йўқ қилиш учун атайлаб қилинган тактика ва у кўпроқ гаровга олинган вазиятга ўхшай бошлади. Жамоадошларим ва барча жамоа ходимларининг хавфсизлиги ва фаровонлиги ҳозир энг муҳим", – деди Осимхен.