Суперлигада 22-тур ўйинлари давом эттирилди. «Қизилқум» жамоаси бу тур «Пахтакор»ни қабул қилди ва 2:0 ҳисобида ғалаба қозонди. Беллашувдан сўнг жамоа бош мураббийи Жамшид Саидов матбуот анжуманида иштирок этди.

— Албатта, ғалаба доим ёқимли. Бугун тўғри стратегия танлаган эдик ва бу ўзини оқлади. Бугун бизни қўллаб-қувватлаб турган барчага ташаккур. Бу кетма-кет иккинчи ғалабамиз.

— Бу стратегия баҳс аввалида режага киритилганмиди?

— Биз била туриб шу стратегияни танладик. Бугун йигитлар майдонда бор кучи билан ҳаракат қилди.

— «Қизилқум» кучлироқ жамоалар билан яхшироқ ўйин кўрсатмоқда. Бунинг сири нимада?

— Бу саволни беришингизни кутган эдим. Бу масала мени ҳам ўйлантиради. Кучсизроқ жамоалар билан ўйинлар қийин кечаётгани рост. Бу руҳий холат билан боғлиқ. Рақибга тўғри баҳо бермаслик билан боғлиқ.

— Лобжанидзенинг жароҳати жиддий эмасми?

— Ҳозир ҳеч нарса айта олмайман. Эртага ҳаммаси аниқ бўлади. Ҳозир унда оғриқ бор. Текшириб, аниқ хулоса қиламиз.

— Сайётов ўйиндан ўйинга очилмоқдами?

— Ўйлашимча, у жуда ҳам иқтидорли футболчи. Бекорга терма жамоалардан чақирув олмаяпти. Тажриба тўплаш орқали ўсишда давом этади. Бугун ҳам дарвозани яхши қўриқлади.  

— Акаки Шулая билан шартнома узайтириладими?

— Унинг мавсум охиригача шартномаси бор. Бу ҳақида ҳали ўйламаяпмиз. Олдинда бизни 4 учрашув кутиб турибди. Вазифани бажаришга қаратилган барча эътиборимиз.