Альваро Моратанинг фикрича, Испания терма жамоасини Евро-2024 ғолиби бўлгунга қадар кўпчилик менсимаган.
"Мен сардорлик учун етарли фазилатларга эга эмаслигимни, биз яхши жамоа эмаслигимизни, Еврода ғалаба қозонишнинг иложи йўқлиги ҳақида кўп ўқидим.
Евро ҳақида ҳужжатли фильмлар ва материаллар чоп этилди ва одамлар биз эришган ютуқларимизни кўришлари мумкин.
Англия ва Франция иккита энг яхши жамоа сифатида сараланди, аммо менимча, биз жамоавий руҳимиз туфайли улардан устун эдик. Ўйлайманки, бу ғалаба қозонишимизнинг сабаби бўлди.
Турнир олдидан испан нашрларидан бирига интервью бергандим. Улар менга Испанияда жаҳон даражасидаги ўйинчи йўқ, деганлари учун бироз жаҳлим чиқди.
Уларнинг юлдузи йўқ дейишди. Мен жавоб бердим: Мен учун Мерино, Фабиан Руиз, Ольмо жуда муҳим ўйинчилар эди.
Ҳаммаси кучли. Бу футболчилар Еврода ўзларини энг яхши томонлама кўрсатишди. Улар ғалаба қозонишимизга ёрдам беришди.
Ўша пайтдан бошлаб ҳамма нарса ўзгарди. Бу йигитларни Испанияда қадрлашмасди. Ачинарлиси, евродаги ғалабадан кейингина ҳамма испан ўйинчилари қанчалик яхши эканини англаб етди", — деди “Милан” ва Испания терма жамоаси ҳужумчиси.
