Бундай натижани кўпчилик кутмаганди, аммо Лиссабоннинг “Спортинг” жамоаси Чемпионлар лигасида “Манчестер Сити”ни 4:1 ҳисобида мағлуб этди. Швециялик Виктор Дьёкереш хет-трик қайд этган бўлса, норвегиялик Эрлинг Холанд пеналтини амалга ошира олмади.
Ўйин олдидан ижтимоий тармоқлардаги Чемпионлар лигаси саҳифасида скандинавиялик ҳужумчилар ўртасидаги дуел қизғин кечди. Унда Дьёкереш ва Холанднинг клублар ва терма жамоалар сафида жорий мавсумда урган голлари сони ҳақида маълумот берилган (шведда 22, норвегияликда 17).
Ўйиндан сўнг Швеция футбол ассоциацияси маълумотларни қайта жойлаштирди ва янгилади: Дьёкереш - 25, Холанд - 17. Швецияликлар ўз тўпурари мавсумдаги кўрсаткич бўйича "Манчестер Сити" юлдузидан яхшироқ эканлигидан хурсанд.
