"Барселона" вингери Ламин Ямал "Мальорка"га қарши ўйиндаги ғалабадан сўнг (5:1) ўз фикрлари билан ўртоқлашди.
17 ёшли футболчи деярли бир ой ичида биринчи марта асосий таркибда майдонга тушди. Учрашувнинг 74-дақиқасида вундеркинд Рафинья Диасга нафис голли узатмани амалга ошириб, ҳисобни 3:1 га етказди.
"Ўйлашимча, биз биринчи бўлимда рақибларимиздан яхшироқ ўйнадик, аммо имкониятларимиздан фойдалана олмадик. Иккинчи бўлимда ҳаммаси биз учун яхши бўлди ва мақсадимизга эриша олдик. Мен ҳар доим жамоа учун бор кучимни ишга солишга ҳаракат қиламан. Ассистентлик қилганимдан хурсандман. Биз аҳмоқона усуллар билан Ла Лигада жуда кўп очко йўқотдик. Уйда ўйин кўрганимда асабийлашаман. Майдонга қайтиш жуда ёқимли эди", - деди Ямал.
