"Манчестер Сити" бош мураббийи Пеп Гвардиола афсонавий баскетболчи Майкл Жорданнинг "Чикаго Буллз"дан кетиши мисолидан фойдаланиб, "шаҳарликлар" учун Родрини йўқотиш аҳамиятини қайд этди. Чикагонинг барча олтита чемпионатдаги ғалабаси Жордан ўйнаган пайтда қўлга киритилган.
Сентябрь ойида 2023/24 йилги мавсумда "Олтин тўп"ни қўлга киритган "Манчестер Сити"нинг испаниялик ярим ҳимоячиси тиззасида олдинги хоч бураги йиртилгани ташхиси қўйилган эди.
"Бу мавсумда биз "Олтин тўп" соҳибисиз ва Англияда ўтган мавсумнинг энг яхши футболчисисиз ўйнаяпмиз. Албатта осон эмас. "Чикаго Буллз" Майкл Жордан билан олтита НБА чемпионлигини қўлга киритди, тўғрими? Жордан фаолиятини якунлаганидан кейин улар қанча соврин ютган? Биз оптимал таркибга қайтишимиз билан яна кучли бўламиз" - деди Гвардиола матбуот анжуманида.
Эслатиб ўтамиз, сўнгги ўнта ўйинда “Манчестер Сити” етти марта мағлубият аламини тотиб кўрган ҳолда, фақат битта ғалабага эришди.
