"Барселона" бош мураббийи Ханси Флик "Бетис" билан ўйинда (2:2) ҳакамга эътироз билдиргани учун қизил карточка олди ва икки ўйинга дисквалификация қилинди. "Леганес"га қарши ўйиндан олдин у бу ҳақида фикр билдирди.

"Дисквалификациямга келсак, менинг реакциям унчалик кучли бўлмаган, деб ўйлайман. Захира ўрнидиғига бориб, ходимлар билан гаплашмоқчи эдим. Мен ҳар доим жамоамга ҳакам қарор чиқарганидан кейин бу қарорга шикоят қилмаслик кераклигини айтиб келаман.

Бу оғир зарба, лекин бу қарорни қабул қилишимиз керак. Балки ўз хулқ-атворим устида ишлашим керакдир. Мен бу лигага энди келганман ва биринчи қизил карточкамни олдим. Ҳакамларнинг барча ўйинларда ва ҳар қандай вазиятда бир хил қарорлар қабул қилишларини кутаман. Ҳакамлар ҳам ўз устида ишлаши мумкин. Биз – инсонмиз, ва инсон хато қилади.

Мен жамоамдан мамнунман, чунки улар норозилик билдирмайди. Уларнинг хатти-ҳаракати ажойиб. Мен футболчилар учун жавобгарман ва уларнинг хулқ-атвори учун масъулиятни ўз зиммамга оламан. Бизнинг фалсафамиз – қўлимиздан келган ишни қилишдир", - деди Флик.