"Манчестер Юнайтед" бразилиялик дарвозабон Жон Викторга қизиқиш билдирмоқда. Бу ҳақда журналист Алан Никсон ёзади.
Инглиз клуби Онанага рақобатчи билан шартнома имзоланиши камерунлик дарвозабоннинг ўйинига ижобий таъсир қилади, деб ҳисобламоқда. Викторнинг “Ботафого” билан меҳнат шартномаси 2027 йилнинг ёзига қадар амал қилади. Transfermarkt бразилиялик футболчини 7 миллион еврога баҳоламоқда.
Жон Виктор “Ботафого” сафида 51 та ўйин ўтказиб, ўз дарвозасидан 41 та гол ўтказиб юборган. Дарвозабон Рио-де-Жанейро клубига Бразилияда чемпионликни қўлга киритишда, шунингдек, Либертадорес кубогини ютишда ёрдам берди.
