Мадриднинг "Реал" клуби ҳужумчиси Килиан Мбаппе Европа Чемпионлар лигаси умумий босқичининг 6-турида Италиянинг "Аталанта" клубига қарши ўйинда (3:2) олган жароҳатидан сўнг, машғулотларга қайтди. Бу ҳақда журналист Фабритсио Романо X ижтимоий тармоғида (собиқ Twitter) хабар берди.
Хабар қилинишича, форвард бўлажак ўйинларга тайёр бўлиш учун астойдил ҳаракат қилмоқда. Мбаппенинг жисмоний ҳолати тез орада Қитъалараро Кубок финалида баҳоланади.
Эслатиб ўтамиз, франциялик футболчи Чемпионлар лигаси умумий босқичи 6-туридан ўрин олган Италиянинг "Аталанта" клубига қарши ўйинда (3:2) жароҳат олганди. Франциялик футболчи ўйиннинг 36-дақиқасидаёқ алмаштирилди.
