Олий лига 9-тури доирасида Олмалиқда меҳмон бўлган "Нефтчи" янги бош мураббий қўл остидаги илк ўйинини мағлубият билан якунлади. Боз устига, жамоа сўнгги дақиқалардагина йирик ҳисобдан қутулиб қолди.
Учрашув олдидан "Олмалиқ" жамоаси рахбари Ботир Мирзаевнинг отаси марҳум Баҳодир Мирзаев хотирасига бағишлаб бир дақиқалик сукут сақланди.
Биринчи дақиқадаёқ мезбонлар ҳужумга отланишди. Азамат Исроиловнинг жарима майдонига ошириб берган тўпини "Нефтчи" посбони эгаллаб олди. 7-дақиқада жарима зарбасидан сўнг Полвоновнинг бош билан берган зарбаси ноаниқ чиқди. 9 дақиқа. Меҳмонларнинг қанотдан уюштирган хужумлари охирига етмай қолди. Орадан ҳеч қанча вақт ўтмай Иқбол Акрамов чап қанотдан оширган тўпини Станоевич қайтариб юборди. Кейинги ҳужумда эса ўйиндан ташқари ҳолат қайд этилди. 13 дақиқада энди Станоевичнинг ўзи зарба йўллади, аммо тўп жуда баландлаб кетди. Орадан бир дақиқа ўтар-ўтмас Зафар Полвонов жарима майдончаси ичидан туриб берган зарбасига аниқлик етишмади. 16-дақиқада "Нефтчи"нинг хужуми Акрамовнинг жарима майдонига тўпни жуда ноаниқ оширишидан сўнг узилиб қолди. 20-дақиқага келиб Полвоновнинг бош билан берган зарбасини Турдалиев ушлаб олди. Кейинги дақиқада Евгений Гогол анча хавфли тарзда жарима майдонига тўп ошириши самара бермади. 25-дақиқада яна Полвонов бу сафар узоқ масофадан зарба йўллаб омадини синаб кўрди. Зарба аниқ чиқди, меҳмонлар дарвозабони тўпни майдон ташқарисига чиқариб юборди. Орадан уч дақиқа ўтиб унинг қайчи услубида берган зарбаси эса ноаниқ кетди.
Шквирин шогирдлари уюштираётган кетма-кет ҳужумлар охир-оқибат самара келтирди: яна ўша Полвонов фаол ҳаракатлари билан пенальти ишлади. Унга нисбатан "Нефтчи" жарима майдонида Муҳсин Низомиддинов қоида бузди ва огоҳлантирилди. 11 метрлик нуқтадан "Олмалиқ" ҳимоячиси Евгений Гоголь тўпни аниқ ва кучли тарзда дарвоза тўрига жойлаб қўйди.
Голдан сўнг "Олмалиқ" ҳужум қилишдан тўхтаб қолмади. Аммо биринчи тайм охиригача ҳисоб ўзгармай қолди.
Иккинчи таймнинг учинчи дақиқасида дарвозабон билан яккама-якка вазиятга чиқиб борган Мўйдин Мамазулумов вазиятдан фойдалана олмади. Кейинги дақиқаларда бурчак тўпидан сўнг жамоа сардори Станоевичнинг бош билан берган зарбаси ноаниқ кетди. 52-дақиқада Достон Абдурахмонов узоқ масофадан зарба йўллади, уриниш аниқ чиққан бўлса-да, Турдалиев тўпни эгаллаб олди. Икки дақиқа ўтиб Мамазулумовнинг зарбаси анча ноаниқ кетди. 57-дақиқада Пиримовнинг зарбасидан сўнг дарвозабон тўпни майдон ташқарисига чиқариб юборди.
Иккинчи тайм ҳам мезбонлар устунлиги остида ўтиб бораётган эди ва бу ҳолат ҳисобда ҳам акс этди. 62, 64 дақиқаларда Санжар Шоаҳмедов томонидан киритилган голлар амалда учрашув тақдирини ҳал қилди.
Шундан кейин гоҳ у, гоҳ бу жамоа хужумлар уюштириб турди. Исроилов, Мамазулуновларда гол уриш имкониятлар бўлди. Меҳмонлардан эса Акромовнинг зарбаси 87-дақиқада дарвоза устунига тегиб қайтди. 89-дақиқага келиб фарғоналиклар ҳисобни қисқартиришга муваффақ бўлишди - Шерзод Ҳакимов дарвозабон билан бирга-бир вазиятни қўлдан чиқармади.
Шу тариқа, "Олмалиқ" очколари сонини 13тага етказиб 5-ўриндаги "Пахтакор"га етиб олди.
Олий лига-2013, 9-тур. Олмалиқ. "Металлург" стадиони.
"Олмалиқ"-"Нефтчи" - 3:1 (1:0)
Голлар: Е.Гоголь (33, пенальтидан), С.Шоахмедов (62, 64) - Ш.Ҳакимов (89).
"Олмалиқ": 1. Мақсатмурот Шомуродов, 2. Тимур Кагиров, 3. Азамат Исроилов, 5. Евгений Гоголь, 7. Достон Абдураҳмонов, 9. Зафар Полвонов (8. Зафар Тўраев, 85), 10. Мўйдин Мамазулумов (21. Шахбоз Эркинов, 75), 11. Зоҳир Пиримов, 13. Игорь Петкович, 20. Дарко Станоевич (сардор), 22. Санжар Шоаҳмедов.
Захирадагилар: 16. Умиджон Хонимқулов, 6. Акмал Рустамов, 18. Самандар Шодмонов, 19. Маъруфхон Муродов, 23. Шерали Жўраев.
"Нефтчи": 21. Фаррух Турдалиев, 3. Шукур Пўлатов, 5. Иқбол Бобохонов, 45. Муҳсин Низомиддинов, 20. Дилёрбек Эрматов, 23. Санжар Асқаралиев, 17. Сардор Мирзаев (11. Отабек Исроилов, 59), 22. Иқбол Акрамов, 7. Мансур Саидов (8. Азиз Алижонов, 67), 6. Бахтиёр Ёқубов (15. Сардор Соибов, 82), 19. Шерзод Ҳакимов.
Захирадагилар: 46. Хуршид Ходжаев, 44. Шавкат Насибуллаев, 27. Ғайрат Жумаев, 30. Отабек Зокиров.
Огоҳлантиришлар: С.Шоаҳмедов (39), Е.Гоголь (86) - И.Бобохонов (17), М.Низомиддинов (32), О.Исроилов (90+1).
Ҳакамлар: Марат Исмоилов (Тошкент), Мўмин Мажидов (Косонсой), Баҳром Норсафаров (Қарши), Дилшод Каримов (Тошкент)
Назоратчи: Булат Галеев (Урганч)
Комиссар: Валерий Лёткин (Тошкент)
