ОКМК бўлажак мавсум олдидан дастлабки трансферини эълон қилди.
Хабарингиз бор, олмалиқликлар сафини қишқи трансферлар ойнасида дарвозабон Валижон Раҳимов тарк этди. Айнан мана шу бўшлиқни тўлдириш мақсадида "кончилар" жамоага янги посбонни жалб қилди.
Ҳумоюншоҳ Сайётов 2003 йилнинг 8 февраль санасида Бухорода туғилган. Фаолияти давомида Яйпаннинг "Турон", Навоийнинг "Қизилум" жамоаларида ҳамда Ўзбекистон ўсмирлар ва ёшлар таркибида ҳам майдонга тушган голкипер бўлажак мавсумдан эътиборан "кончилар" шарафини ҳимоя қилади.
193 см бўйга эга бўлган 21 ёшли посбон ўтган мавсумда навоийликлар сафида 10 та учрашувда майдонга тушган. Учрашувларнинг 4 тасида ўз дарвозаси дахлсизлигини сақлаб қолган. ОКМК ФК ва футболчи ўртасида 2 йиллик шартнома имзоланди.
