Келаси ҳафта "Челси" бошқарувини қўлига оладиган "Реал" собиқ бош мураббийи Жозе Моуриньо Испания чемпионатининг сўнгги турида "Осасуна"га қарши учрашувда жамоанинг уч етакчи футболчиси - Икер Касиляс, Пепе ва Криштиану Роналдуларнинг майдонга тушмагани сабабини тушунтирди.
"Клуб шифокорлари ва уларнинг ўзлари ҳам тасдиқлашди - улар ўйинга тайёр эмасдилар. Шунинг учун ҳам ўйин қайдномасига киритмадим. Уччала футболчига ҳам бел оғриғи ташхиси қўйишди.
Буни инкор қилсам нотўғри бўларди. Лекин бу "Реал"даги фаолиятим юзасидан охирги интервьюим бўлиб қолади", дея португалия мутахассиснинг сўзларидан иқтибос келтирмоқда Punto Pelota.