Германиянинг Вайссенхаус шаҳрида "2025 Freestyle Chess Grand Slam" мусобақасида бугун чорак финалнинг иккинчи ўйинлари ўтказилди.

Плей-офф босқичи классик шахмат форматида ўтказилмоқда. Нодирбек Абдусатторов бугун оқ доналарда Магнус Карлсенга қарши ўйнади ва имкониятни бой берди. Ҳамюртимиз кеча ҳам Магнусга ютқазганди.

Жавоҳир Синдаров ва АҚШлик Хикару Накамура ўртасидаги бугунги ўйинлар драматик тарзда кечди. Жавоб ўйинида ватандошимиз қора доналарда ўйнади. Ўйиннинг аксар қисми тенгкурашлар остида кечган бўлса, эндшпилда эса Накамура битта пиёда устунлигига эга эди. Аммо Синдаров дурангни ушлаб қолишга муваффақ бўлди. Кечаги баҳс ҳам дуранг билан якунлагани учун томонлар ғолибни аниқлаш мақсадида рапид йўналишида тай-брек ўйинларини ўтказишди.

Синдаров илк ўйинда қора доналарда ҳаракат қилди. Дебютда ва ўйин ўрталарида Хикару устунликни қўлга киритди. Аммо ўйин сўнгида АҚШЛИк шахматчи h7 хонасидаги текин пиёдани уриб, қўпол хатога йўл қўйди. Бунинг оқибатида Жавоҳир ҳужумга ўтиб кетди ва рақибни таслим этди.

Тай-брекнинг иккинчи ўйинида ўзбек гроссмейстери оқ доналарда ўйнади. Бу партия томонлар жуда кўп хатога йўл қўйишди. Дастлаб устунлик Синдаров томонига ўтган бўлса, ўйин ўрталарида Хикару ғалаба сари ҳаракат қила бошлади ва ғалабага яқин эди. Жавоҳир дурангни ушлаб қолиш учун ҳаракат қила бошлади. Накамура эса ўйин сўнггида пиёда билан хато юришни амалга оширди. Натижада Жавоҳирнинг пиёдаси Фарзинга чиқиб кетиши аниқ бўлди ва АҚШлик гроссмейстер мағлубиятни тан олди.

Синдаров ярим финалда АҚШлик Фабиано Каруанага қарши баҳсларда иштирок этди. Иккинчи ярим финал эса Винсент Кеймар ва Магнус Карлсен ўртасида кечади.

Чорак финал натижалари:

Алиреза Фирузжа - Винсент Кеймар - 0,5 : 1,5
Жавоҳир Синдаров - Хикару Накамура - 1 : 1 (тай-брек - 2:0)
Фабиано Каруана - Гукеш Доммараджу - 2:0
Магнус Карлсен - Нодирбек Абдусатторов - 2:0

Эслатиб ўтамиз, мусобақанинг мукофот жамғармаси — 750.000 долларга тенг. Ғолиб шахматчига 200.000 доллар берилади.