"Манчестер Сити" бош мураббийи Хосеп Гвардиола Англия Премьер-Лигасининг 25-туридан ўрин олган "Ньюкасл Юнайтед"га қарши учрашувда (4:0) ҳимоячи Абдуқодир Ҳусановнинг ўйини ҳақида фикр билдирди.
— Ҳусановнинг ҳужумга ўтишдаги тезлиги – айнан шунинг учун биз уни сотиб олдик. У жуда тезкор. Аммо Абдуқодир жангларда ортиқча тажовузкорлик кўрсатади ва агар уларни ютиб бера олмаса, муаммога дуч келади. У ҳали ҳам адаптация жараёнида, лекин вақт ўтиши билан барчасини ўзлаштиради, — дея Гвардиоланинг сўзларини келтиради "шаҳарликлар"нинг расмий сайти.
Эслатиб ўтамиз, 20 ёшли Ҳусанов январда "Манчестер Сити"га кўчиб ўтганидан бери барча турнирларда учта ўйин ўтказиб, бир гол урган.