Лондоннинг "Арсенал" клубига тегишли бўлган марказий ҳимоячи Вильям Салиба Испания чемпионатига кўчиб ўтиши мумкин. Бу ҳақда "Todofichajes" портали саҳифаларида маълум қилинди.
Манбага кўра, 23 ёшли футболчини ҳимояда муаммоларга дуч келаётган Мадриднинг "Реал" клуби ўз сафига қўшиб олмоқчи. Салибанинг эҳтимолий трансфери 80 миллион еврога баҳоланмоқда. Француз ва "канонирлар" ўртасидаги амалдаги меҳнат шартномаси муддати 2027 йил июнь ойи охирида тугайди.
Ҳимоячи Англия чемпионатининг жорий мавсумида 25 та ўйин ўтказди. Салиба иккита гол урди, иккита сариқ карточка олди ва бир марта майдондан четлатилди.
