Винисиус Жуниор ёш бразилиялик футболчига қаратилган ирқчиликни қоралади.

“Палмейрас” U-20 жамоаси ҳужумчиси Луиджи “Либертадорес ёшлар кубоги” доирасида “Серро Портено”га қарши ўйинда (3:0) мухлислар томонидан ҳақорат қилинди. 18 ёшли йигит майдондан чиқиб кетаётганда унга нисбатан ирқчиликка хос қўшиқ айтишди.

Футболчи ўйиндан кейин берган интервюсида йиғлаб юборди.

"Қачонгача бунга чидаймиз? Айтинг-чи, қачонгача? Уларнинг қилган иши жиноят, бу ҳақда сўрашни хоҳламайсизми?" – деди Луиджи журналистга.

"Реал Мадрид" вингери Винисиус Жуниор мухлисларнинг камситувчи хатти-ҳаракатларини қоралади ва КОНМEБОЛни танқид қилди.

"Ўз позициянгни билдирганинг яхши, ука. Бу қайғули, лекин кучли бўл. Кел, бирга курашамиз.

Қачонгача бу давоми этади, КОНМEБОЛ? Сиз ҳеч қачон ҳеч нарса қилолмайсиз! Ҳеч қачон!" – деб ёзган Винисиус Instagram'даги постида.