Sport Bild хабарига кўра, Хави Симонснинг ёзда "РБ Лейпциг"ни тарк этиш эҳтимоли тобора ортиб бормоқда, гарчи клуб унинг шартномасини шу йил сотиб олган бўлса ҳам. Сўнгги вақтларда 21 ёшли футболчи кийиниш хонасида жанжал келтириб чиқараётгани ҳақида миш-мишлар тарқалди.

Агар "Лейпциг" EЧЛ йўлланмасини қўлга кирита олмаса, кетиш муқаррар кўринади. Қишда "Лейпциг" Симонснинг шартномасини 50+30 миллион еврога тўлиқ сотиб олди, аммо мавсумнинг иккинчи қисмида ярим ҳимоячи бутун жамоа каби ўз салоҳиятини тўлиқ намойиш эта олмади.

Агар Симонснинг сотилиши ҳақиқатга айланса, "Лейпциг" у учун сарфлаганидан кўпроқ пул олиши деярли аниқ, чунки нидерландиялик футболчига АПЛ клублари қизиқиш билдирмоқда. Шу билан бирга, "Лейпциг" "Майнц" футболчиси Надим Амирини кузатиб бораётгани айтилмоқда. У Симонсга ўринбосар сифатида кўриладими ёки йўқми - ҳозирча номаълум.

Эслатиб ўтамиз, Симонс бу мавсумда "Лейпциг" сафида барча мусобақаларда 24 та ўйинда 7 та гол ва 4 та голли узатмани амалга оширган.