Авлодлари Африкадан бўлган ва Испанияда туғилган ҳужумчи Ассане Диао Испания терма жамоасидан воз кечишга қарор қилди. У Испаниянинг турли ёшлар ва ўсмирлар терма жамоаларига таклиф қилинган, аммо катталар даражасида ўз ватани Сенегал учун ўйнашга қарор қилган.
Эслатиб ўтамиз, Диао яқингача Севильянинг "Бетис" клуби шарафини ҳимоя қилиб келаётган эди, аммо у қишда "Комо"га ўтди ва у ерда Италия чемпионати олий лигасида бешта гол уришга улгурди.
Ҳозир у ўн тўққиз ёшда, сентябрда эса йигирма ёшга тўлади. У Сенегал терма жамоасидаги илк ўйинларини шу ойда ЖЧ-2026 саралаши доирасида Судан ва Тогога қарши ўтказади.
