Журналист Руди Галеттининг сўзларига кўра, "шпорлар" ҳужумчи Тимо Вернерни сотиб олиш вариантини фаоллаштирмасликка қарор қилган, шунинг учун у ижара муддати тугаганидан кейин "Лейпциг"га қайтади, бироқ у немис клубининг келгуси мавсумдаги режаларида ҳам йўқ. Улар аллақачон сотиш устида ишламоқда, чунки унинг шартномаси 2026 йилгача мўлжалланган.
"Ливерпул"нинг собиқ бош мураббийи, ҳозирда Ред Буллда глобал футбол бўлими раҳбари Юрген Клопп футболчига ечим топишга ёрдам бериши мумкин. Клопп "РБ Лейпциг", "Нью-Йорк Ред Буллз", "Ред Булл Залцбург" ва бошқа клубларнинг трансфер сиёсати учун жавобгардир.
TEAMtalk хабарига кўра, Вернерга МЛСнинг бир нечта клублари, жумладан, "Нью-Йорк Ред Буллз" ҳам қизиқиш билдирмоқда. Бу унинг бир Ред Булл клубидан бошқасига ўтиши мумкинлигини англатади.
Қўшимча қиламизки, 29 ёшли немис ўтган йилнинг январ ойида "Тоттенхэм"га ижара асосида ўтган, ёзда эса клуб уни яна бир мавсумга ижарага олганди. Ушбу кампания бошлангандан бери Вернер "Тоттенхэм" учун барча мусобақаларда 945 дақиқада 1 та гол урди ва 3 та голли узатмани амалга оширди.
