Jurnalist Rudi Galettining so‘zlariga ko‘ra, "shporlar" hujumchi Timo Vernerni sotib olish variantini faollashtirmaslikka qaror qilgan, shuning uchun u ijara muddati tugaganidan keyin "Leypsig"ga qaytadi, biroq u nemis klubining kelgusi mavsumdagi rejalarida ham yo‘q. Ular allaqachon sotish ustida ishlamoqda, chunki uning shartnomasi 2026 yilgacha mo‘ljallangan.
"Liverpul"ning sobiq bosh murabbiyi, hozirda Red Bullda global futbol bo‘limi rahbari Yurgen Klopp futbolchiga yechim topishga yordam berishi mumkin. Klopp "RB Leypsig", "Nyu-York Red Bullz", "Red Bull Zalsburg" va boshqa klublarning transfer siyosati uchun javobgardir.
TEAMtalk xabariga ko‘ra, Vernerga MLSning bir nechta klublari, jumladan, "Nyu-York Red Bullz" ham qiziqish bildirmoqda. Bu uning bir Red Bull klubidan boshqasiga o‘tishi mumkinligini anglatadi.
Qo‘shimcha qilamizki, 29 yoshli nemis o‘tgan yilning yanvar oyida "Tottenxem"ga ijara asosida o‘tgan, yozda esa klub uni yana bir mavsumga ijaraga olgandi. Ushbu kampaniya boshlangandan beri Verner "Tottenxem" uchun barcha musobaqalarda 945 daqiqada 1 ta gol urdi va 3 ta golli uzatmani amalga oshirdi.
