Ла Лига раҳбарияти "Реал Мадрид" директорининг "Вильярреал"га қарши ўйинни кечиктириш ҳақидаги илтимосини рад этди.
"Лос-Бланкос" Чемпионлар лигаси 1/8 финалида "Атлетико"га қарши жавоб ўйинидан сўнг 72 соатдан камроқ вақт ичида "Сариқ сув ости кемаси" билан ўйнаши керак эди.
Карло Анчелотти матбуот анжуманида очиқчасига айтдики, агар ўйинлар орасидаги 72 соатлик танаффусга риоя қилинмаса, кейинги сафар "Реал Мадрид" майдонга тушишдан бош тортади.
Журналист Марио Кортехананинг хабар беришича, клуб директори Эмилио Бутрагеньо Ла Лига раҳбариятига қўнғироқ қилиб, Чемпионлар лигасининг 1/8 финали тақвими аниқланиши биланоқ "Вильярреал" билан учрашувни кечиктиришни сўраган, бироқ рад жавоби берилган. Чоршанба куни, "Атлетико" билан дербидан сўнг, Бутрагеньо футболчиларнинг соғлиғига жиддий зарар етказиш хавфини кўрсатиб, худди шундай илтимос билан чиқди, аммо Ла Лига аниқ жавоб бермади.
