"Барселона" Ла Лига доирасида сафарда "Атлетико"ни мағлуб этиб (4:2), мағлубиятсиз сериясини давом эттирди.

"Кўк-анорранглилар" 0:2 ҳисобида ютқазаётганди, аммо ўйин охирида тўртта гол уриб, ўйинни ўзгартириб юборди. Каталония гранди барча мусобақаларда кетма-кет 18 та ўйинда мағлубиятга учрамади. Шу тариқа, Флик 2021 йилнинг кузидан 2024 йилнинг майигача жамоанинг аввалги бош мураббийи Хави Эрнандеснинг мағлубиятсиз рекордини такрорлади.

"Барселона"нинг сўнгги мағлубияти 21 декабрь куни бўлиб ўтганди - ўшанда "Атлетико" рақибни ранжитганди (1:2). Кейинги 18 ўйинда Флик жамоаси 15 марта ғалаба қозонди ва уч марта дуранг ўйнади.