"Ювентус" 2025 йилги клублар ўртасидаги Жаҳон чемпионатидан сўнг Игор Тудор билан шартномани бекор қилиши мумкин.
Олдинроқ Турин клуби Тьяго Мотта ўрнига хорватиялик мутахассис бош мураббий этиб тайинлангани ҳақида хабар берган эди.
Tuttosport нашри хабарига кўра, Тудорнинг "Ювентус" билан шартномаси 2025 йилнинг июнигача амал қилади, агар клуб жорий мавсум охирида Чемпионлар лигасига йўлланма олса, уни бир йилга узайтириш мумкин. Шу билан бирга, клуб 30 июлга қадар товон тўламасдан шартномани бир томонлама бекор қилиш ҳуқуқига эга - шу тариқа, Тудор клублар ўртасидаги жаҳон чемпионати вақтида "Ювентус"ни бошқаради, аммо у кейинги мавсум учун ҳеч қандай кафолатга эга эмас.
Қайд этилишича, Тудор клуб вақтинчалик мураббий излаётганини билиб, "Ювентус"ни бошқаришга рози бўлган, бироқ хорватиялик мураббий раҳбариятнинг ишончини қозониб, мавсум охиригача шартномани узайтиришга эриша олишига ишонмоқда. Шу билан бирга, ОАВ хабарларига кўра, бу шартлар Мотта ўрнига номзодлар қаторидан ўрин олган Роберто Манчинига ҳам мос келмаган.
