Португалия терма жамоаси ўз майдонида Миллатлар Лигаси 1/4 финалининг жавоб ўйинида Данияни мағлуб этди - 5:2.
Асосий вақтда мезбонлар сафида Криштиану Роналду ва Франсишку Тринкан гол урган бўлса, яна бир голни данияликлар ҳимоячиси Йоаким Андерсен ўз дарвозасига жойлаб қўйди. Учрашув бошида Роналду пенальтидан фойдалана олмади.
Меҳмонлардан Расмус Кристенсен ва Кристиан Эриксен асосий вақтда рақиб дарвозасини ишғол қилди.
Қўшимча бўлимларда Португалия терма жамоаси сафида Франсишку Тринкан ва Гонсалу Рамуш гол урди.
Португалияликлар данияликларни икки ўйин натижасига кўра 5:3 ҳисобида мағлуб этиб, Миллатлар Лигаси ярим финалида Германияга қарши баҳс олиб боради.
