АПЛ клублари мавсум стартига қадар трансфер ойнасини ёпиш имкониятини кўриб чиқади.
The Telegraph'нинг ёзишича, пайшанба куни лига йиғилишида 14 августни битимлар тузишнинг сўнгги муддати сифатида белгилаш масаласини овозга қўйиш режалаштирилган. Чемпионат 16-куни старт олади.
Ўзгартиришлар қабул қилиниши учун 14 та клубнинг розилиги керак бўлади. Шу билан бирга, агар мулкдорлар ва директорлар иштирокидаги дастлабки музокаралар ғоянинг унчалик иштиёқ уйғотмаслигини кўрсатса, овоз бериш умуман бўлмаслиги мумкин.
Таъкидланишича, Европанинг бошқа лигаларини ҳам мавсум бошланишидан олдин ёпишга кўндиришда муаммолар мавжуд. Шунингдек, сўнгги йилларда юлдузлар учун катта харажат қилаётган Саудия Арабистони масаласи ҳам ҳал этилмаган. Агар бошқа чемпионатлардаги вазият ўзгармаса, АПЛ муддат ўзгарганидан кейин ноқулай аҳволга тушиб қолиши мумкин.
