APL klublari mavsum startiga qadar transfer oynasini yopish imkoniyatini ko‘rib chiqadi.
The Telegraph'ning yozishicha, payshanba kuni liga yig‘ilishida 14 avgustni bitimlar tuzishning so‘nggi muddati sifatida belgilash masalasini ovozga qo‘yish rejalashtirilgan. Chempionat 16-kuni start oladi.
O‘zgartirishlar qabul qilinishi uchun 14 ta klubning roziligi kerak bo‘ladi. Shu bilan birga, agar mulkdorlar va direktorlar ishtirokidagi dastlabki muzokaralar g‘oyaning unchalik ishtiyoq uyg‘otmasligini ko‘rsatsa, ovoz berish umuman bo‘lmasligi mumkin.
Ta’kidlanishicha, Yevropaning boshqa ligalarini ham mavsum boshlanishidan oldin yopishga ko‘ndirishda muammolar mavjud. Shuningdek, so‘nggi yillarda yulduzlar uchun katta xarajat qilayotgan Saudiya Arabistoni masalasi ham hal etilmagan. Agar boshqa chempionatlardagi vaziyat o‘zgarmasa, APL muddat o‘zgarganidan keyin noqulay ahvolga tushib qolishi mumkin.
