Италия Суперкубоги "тўртлик финали" форматини сақлаб қолади.
Жанлука Ди Марцио сайтида маълум қилинишича, Миланда бўлиб ўтган А Серия клублари йиғилишида Италия Суперкубогининг амалдаги 4 жамоа иштирокидаги форматини 2025/26 йилги мавсумда ҳам сақлаб қолишга қарор қилинган.
Турнирнинг навбатдаги ўйинлари қаерда ўтказилиши ҳозирча номаълум. La Sicilia мақоласига кўра, Саудия Арабистони кейинги тўртта турнирдан иккитасини ўтказиш бўйича келишувга эга ва қайси йилларда мезбонлик қилишини ўзи танлаши мумкин. Қарор апрель ойи охиригача қабул қилиниши кутилмоқда.
Шу тариқа, келаси йил Италия Суперкубогида яна А Сериянинг дастлабки икки жамоаси ва Италия Кубоги финалчилари иштирок этади.
